Compiled By Jeff Henderson from BibleDatabase Modules
Job 4
[1] [2] [3] [4] [5] [6] [7] [8] [9] [10] [11] [12] [13] [14] [15] [16] [17] [18] [19] [20] [21] [22] [23] [24] [25] [26] [27] [28] [29] [30] [31] [32] [33] [34] [35] [36] [37] [38] [39] [40] [41] [42]
JOB 4:1 Toe antwoord Élifas, die Temaniet, en sê:
JOB 4:2 As 'n mens dit met 'n woord by jou waag, sal jy ontstemd wees? Maar woorde inhou--wie kan dit?
JOB 4:3 Kyk, jy het baie mense tereggewys en slap hande versterk.
JOB 4:4 Jou woorde het opgerig die wat struikel, en jy het knikkende knieë versterk.
JOB 4:5 Maar nou dat dit jóu oorkom, is jy moedverlore; nou dat dit jóu tref, is jy verslae!
JOB 4:6 Is jou Godsvrees nie jou hoop, jou vrome wandel nie jou verwagting nie?
JOB 4:7 Bedink tog, wie het ooit onskuldig omgekom, en waar is opregtes verdelg?
JOB 4:8 Volgens ek gesien het: Die wat onreg ploeg en moeite saai, dié maai dit.
JOB 4:9 Deur die asem van God kom hulle om, en deur die geblaas van sy toorn word hulle vernietig.
JOB 4:10 Die gebrul van die leeu en die stem van die bruller--ja, die tande van die jong leeus word uitgebreek.
JOB 4:11 Die leeu kom om by gebrek aan prooi, en die kleintjies van die leeuin word verstrooi.
JOB 4:12 Verder is 'n woord op geheimsinnige wyse na my gebring, en my oor het 'n gefluister daarvan opgevang,
JOB 4:13 by die gedagtespel, uit naggesigte gebore, wanneer diepe slaap op die mense val.
JOB 4:14 Skrik het oor my gekom en siddering en het my hele gebeente laat bewe.
JOB 4:15 Toe skuif daar 'n gees voor my verby; die hare van my vlees het opgerys.
JOB 4:16 Hy bly staan, maar ek kon sy gedaante nie herken nie--'n verskyning voor my oë! Ek hoor die gefluister van 'n stem wat sê:
JOB 4:17 Sou 'n sterfling regverdig wees voor God? Of 'n man rein wees voor sy Maker?
JOB 4:18 Kyk, in sy dienaars stel Hy geen vertroue nie, en by sy engele ontdek Hy dwaling.
JOB 4:19 Hoeveel meer by hulle wat kleihuise bewoon, van wie die grondslag in die stof is, wat fyngedruk word soos 'n mot.
JOB 4:20 Tussen môre en aand word hulle verpletter; hulle kom vir ewig om sonder dat iemand daar ag op gee.
JOB 4:21 Word hulle tentlyn nie losgeruk in hulle nie? Hulle sterwe, en dit sonder wysheid.
Created with BibleDatabase HTML Compiler